سعيد بمقص عمّار

اليوم شرّفوني جماعة 404 بزيارتهم لمدونتي على المكتوب و فرحوا بيّا أكثر ممّا كنت نتصوّر على كل هي كانت زيارة متوقعة في انتظار زيارة ناس أخرين شكون يعلم؟

المدونة هيromdhane.maktoobblog.com أكيد أغلبيتكم ما يعرفوهاش و ما سمعوش بيهة و حتى القليل الي يعرفها ربّما بالصدفة كيما فكرة انشائها أنا علاقتي بالانترنات عمرها قصير برشة هذاكه علاش مازلت نعتبر روحي أمي تقنيا و بما أني واحد من المشاغبين بعد ما نحّوا منّا صفة المواطنة الي أكيد ثمّة شكون يختلف معايا في وجودها من الأساس و بعد انطلاق الأحداث في الحوض المنجمي وبما أني مانيش في بلاد المشاغبين بحكم العمل لاحظنا أنو الأخبار الي يخلوها توصل ديمة تكون موش كيف الي قالوهالي دارنا و سمعتها من عند الناس مع اقتصار التغطية على بعض وسائل الاعلام الحزبية الي هي و جوّها كنت ديما نسأل عاى الجديد خاصة بيانات النقابات الأساسية في الرديف و الاتحاد المحلي للشغل بالرديف و ثماش فيديوات و تصاور ديما يجاوبوني شوف الأنترنات في خلال هذه الزيارات اكتشفت بالصدفة عالم المدونات رغم اني قريت علية في الجرايد قلت شنو المشكل علاش ما نجربش نعمل مدونة و كان ما عجبتيش الفكرة نبطّل. هكاكه كانت البداية رغم نعتبر روحي فاشل في التعبير و بما أنّي أكثر كانت تشغل مخي هي أخبار ناسي المشاغبين بالطبيعة كان عندها نصيب الأسد في شويّة لكلام الي نكتبو بالله قولولي نكلّم دارنا يقولولي راو 2 كروموجان طاحو في الدّار تكلّم خوك يقلّك راني هارب نخاف لا يشدّوني تكلّم صاحبك يقلّك راو خلعولي حانوتي و ما خلّو فيه شي و يقولولك راو صاحبك خالد التواتي ضربوه بكرطوشة لرجليه و راو صعيب يرجع يمشي كيف العادة آش تحبوني نعمل ؟

و الي كدّر عليا تحل التلفزة و تسمع سي برهان و سي بوبكر و تقرى آش كتب سي علي بن نصيب و بيانات بعض الاحزاب آش نعمل؟

على نطمّن سي عمّار و جماعتو كل تصويرة نطيح في يديّ باش نهبّطها ربّما مقصهم يغلب لكن مانيش مبطّل