حكايات المشاغبين

بدات الحركة تدب و ترجع شوي شوي لبلاد المشاغبين و لو انّو الي يحوّسوا في الشوارع أغلبيتهم لابسين اللون الأزرق ومعاهم وسائل الترفيه متاعهم باش ما يقلقوش شكون يعرف شوارع هالبلاد كلها قينية لكن تباركالله كثرت العيون و ولاّت على كل لون كيف تبدى تحوّس في الشارع تقولش عليك عارض أزياء على البوديوم عيون الضيوف لكل مركزة عليك وأي حركة منك تشعل في وجهك فلاشات المصورات متاعهم وكانك نجم و مرشّحينيك للبطولة تلقى كراهب لوكسيون فيهم مختصين يهزّوك و يفرحو بيك من غير ما يفيّقو حد فازة اللوكسيون و ركّابها أكيد جديدة عليكم ايييه صدّقوا رانا بلاد رايدة في كل شي ربّي يبعّدهم عليكم الحاصيلو من كثر الهمّ المشاغبين دوّروها تنكيت و حكايات و اشاعات قالك جماعة اللوكسيون يلمّو في أكثر عدد ممكن من المشاغبين و بهدوء علاش؟؟؟

قالك ثمّة مسهول كبير كبييييييير يحب يعمل طلّة كيف زيارات بوش و رامسفيلد لبغداد و باش يعمل لقاءات في المطار او المنطقة الخضراء (مقر الولاية هو المنطقة الوحيدة الخضرا كيف سويسرا؟؟) المسهول هذا ما عندوش جديد باش يجيبو معاه هذاكه علاش يلمّولو في برشة مشاغبين باش يعمل لفتة كريمة و يعفو عليهم؟ باسمي و باسم الشاغبين الي يوافقوني الراي نتقدم لسيادته بجزيل الشكر على رعايته الموصولة و دام عزّه و أفلامه

انشاءالله الفيلم هذا تشاهدونه عن قريب وما تنسوش باش تصفقوا و تباركو و تساندو

انشاءالله كلامي ما يتحققش و نطلع كذّاب و مشاغب
هذي كعبة المولوتوف متاعي